အာမခံဖြင့် ပြန်လွှတ်သည့် ပုဒ်မအားမကျေနပ်၍ သံတွဲပဋိပက္ခဖြစ်ပွားရခြင်းဖြစ်

ရခိုင်ပြည်နယ်၊ သံတွဲမြို့၌  ပြစ်မှုပုဒ်မအား မကျေနပ်ရာကနေ ဆူပူမှုတစ်ခု စက်တင်ဘာ ၂၉ ညနေပိုင်းက ဖြစ်ပွားခဲ့သည်။ ဖြစ်စဉ်မှာ အမျိုးဘာသာသာသနာစောင့်ရှောက်ရေးအသင်း၏ ဗုဒ္ဓဘာသာ အလံအား သုံးဘီးဆိုင်ကယ်တွင် ချိတ်ထား သည်ကို အစ္စလာမ်ဘာသာဝင်အချို့က ဖျက်ဆီးသဖြင့် ဒေသခံတို့က မကျေနပ်၍ သံတွဲရဲစခန်း၌ တိုင်ချက်ဖွင့်ခဲ့ခြင်း ဖြစ်သည်ဟု သိရသည်။ 

သံတွဲရဲက အဆိုပါကျူးလွန်သူတို့အား ပုဒ်မ ၂၉၄/၅၀၆၊ တို့ဖြင့် စွဲချက်တင်ကာ အာမခံဖြင့် ပြန်လွှတ်ပေး လိုက်သည်။

''သံတွဲအခြေအနေက ပုဒ်မကိစ္စကို မကျေနပ်လို့ဖြစ်တာလို့တော့ ပြောနေကြတယ်၊ အသေချာတော့ မသိသေးဘူး၊ ရဲစခန်းမှာ သူတို့အမျိုးဘာသာသာသနာစောင့်ရှောက်ရေးအဖွဲ့တွေ လာတယ်၊ ဘုန်း တော်ကြီးလည်း ပါတယ်၊ စခန်းမှူနဲ့ စကားပြောကြတယ်၊ သူတို့ဘက်ကတော့ ချက်ချင်းလုပ် မပေးသေးဘူး၊ သူတို့ ကိစ္စကို ပြောတော့ မတင်မကျနဲ့ ပြီးသွားတယ်၊ အဲဒါနဲ့မကျေနပ်လို့ခဲနဲ့ ပေါက်တာပါ''ဟု သံတွဲ မြို့ခံတစ်ဦးက ပြောသည်။

အဆိုပါကိစ္စကို ဒေသခံများမကျေမနပ်ဖြစ်ရာမှ စက်တင်ဘာလ ၂၉ ရက်နေ့ ညနေပိုင်းတွင် သံတွဲမြို့ အမှတ်(၃) ရပ်ကွက်ရှိ အစ္စလာမ်ဘာသာဝင် နေအိမ်များဖြစ်သည့် ဦးကျော်ဇံလှနှင့် ဦးတင်ဝင်း တို့နေအိမ် ကို ခဲဖြင့်ပစ်ပေါက်ခဲ့ကြောင်း၊ ခဲဖြင့်ပစ်ပေါက်ခဲ့သူ ညီညီလွင်နှင့်ကျော်မင်းထိုက်တို့ နှစ်ဦးအား ရဲတပ်ရင်း (၃၃)က ဖမ်းဆီး၍ သံတွဲရဲစခန်းသို့ ပို့ဆောင်ပေးခဲ့သည်ဟု သိရသည်။

ညနေ ၆ နာရီခွဲအချိန်၌ သံတွဲမြို့ ဒွါရာဝတီမြို့သစ်(က)ရပ်ကွက်နှင့်(ခ)ရပ်ကွက်မှလူ ၅၀ခန့်မှာ စုဝေးချီတက် လာသဖြင့်ခရိုင်ရဲမှူးဦးစီးသည့် လုံခြုံရေးအဖွဲ့များက လမ်းများပိတ်ဆို့ထားနိုင်ခဲ့သည်ဟု သိရသည်။

ည ၇နာရီ တွင် သံတွဲမြို့ အမှတ်(၃)ရပ်ကွက်၊တာဝတိံသာလမ်းနှင့်မဟာဗန္ဓုလလမ်းထောင့်ရှိ အစ္စလာမ် ဘာသာဝင်ဦးခင်မောင်နေအိမ်နှင့် ၄င်းနေအိမ်အတွင်းရှိ အာရ်ဗီစာသင်ကျောင်းအား ခဲဖြင့် ပစ်ပေါက်ခဲ့ ကြသည်။ လူအင်အားမှာ (၈၀)ခန့်ဖြစ်လာပြီး ဦးခင်မောင်နေအိမ်အား မီးရှို့ခဲ့ကြသဖြင့် ခရိုင်ရဲတပ်ဖွဲ့တို့ ရောက်လာကာ အဆိုပါလူစုအား သတိပေးပြောဆိုခဲ့ပြီး  ရဲတပ်ဖွဲ့မှ လူစုခွဲမရသဖြင့် မီးခိုးဗုံး(၁)လုံးနှင့် ရော် ဘာကျည်အတောင့် ၂၀ဖြင့် သတိပေးပစ်ခတ်ခဲ့ရသဖြင့် လူအုပ်စုမှာ ညနေ၇နာရီကျော်တွင် လူစုကွဲသွား ခဲ့သည်ဟု သိရသည်။

ည(၈)နာရီဝန်းကျင်တွင် မီးသတ်ကား(၂)စီး ရောက်ရှိလာပြီး မီးငြှိမ်းသတ်ခဲ့ရာမှ မီးညွန့်ကျိုးခဲ့သည် ဟုသိရသည်။ယခုအခါ တောင်ကုတ်မြို့နယ်ရဲစခန်းမှရဲတပ်ဖွဲ့အင်အား (၂၀)မှာ သံတွဲမြို့သို့ လာရောက်ပူး ပေါင်းပြီး လုံခြုံရေးများ တိုးမြှင့်ချထားရသည်ဟု သိရှိရသည်။