စီးပွားရေးလုပ်ငန်းများဖွံ့ဖြိုးရေးအတွက် ပြုပြင်ပြောင်းလဲမှုများ ဆောင်ရွက်နေသည့်လမ်းကြောင်းပေါ်တွင်ရှိသော်လည်း ပိုမိုကောင်း မွန်သည့်စည်းမျဉ်းများပေါ်ပေါက်ရန်လိုအပ်

မြန်မာနိုင်ငံသည် စီးပွားရေးလုပ်ငန်းများ ဖွံ့ဖြိုးတိုးတက်စေရန် ပြုပြင်ပြောင်းလဲမှုများ ဆောင်ရွက်နေသည့် လမ်းကြောင်းပေါ်တွင် ရှိသော်လည်း ပိုမိုကောင်းမွန်သည့် စည်းမျဉ်း ဥပဒေများပေါ်ပေါက်လာစေရန် ပြုပြင်ပြောင်း လဲမှုများ ကျယ်ကျယ်ပြန့်ပြန့်ဆောင်ရွက်သွား ရန်လိုအပ်ကြောင်း ကမ္ဘာ့ဘဏ်နှင့် အပြည်ပြည် ဆိုင်ရာဘဏ္ဍာရေးကော်ပိုရေးရှင်းတို့၏ Doing Business အစီရင်ခံစာတွင် ဖော်ပြထားသည်။

ယင်းအစီရင်ခံစာသည် ကမ္ဘာ့နိုင်ငံအသီး သီး၏ စီးပွားရေးလုပ်ငန်းများ၊ ဥပေဒေများ၊ လုပ်ထုံး လုပ်နည်းများကိုလေ့လာဆန်းစစ်ထားသည့်အစီရင်ခံစာဖြစ်ပြီး မြန်မာနိုင်ငံအတွက် ယခုနှစ်တွင် စတင်ထည့်သွင်းလေ့လာဆန်းစစ် ထားခြင်းဖြစ်ကြောင်း သိရသည်။

''ဒီနှစ်ထုတ်ဝေတဲ့ Doing Business အစီ ရင်ခံစာမှာ မြန်မာနိုင်ငံရဲ့ စည်းမျဉ်းဥပဒေတွေကို ပထမ ဦးဆုံးအကြိမ် ထည့်သွင်းဖော်ပြထားတယ်။ မြန်မာဟာ နှစ်ပေါင်းများစွာ ကမ္ဘာလုံးဆိုင်ရာ စီးပွားရေးနဲ့ အဆက်ပြတ်နေပြီး အခုမှစတင်ပွင့် လင်းလာတဲ့ နိုင်ငံတစ်ခုဖြစ်တယ်'' ဟု ကမ္ဘာ့ ဘဏ်၏မြန်မာ နိုင်ငံဆိုင်ရာ ဌာနေကိုယ်စားလှယ် မစ္စတာခန်သန်ရှင်ကာက ပြောသည်။

အစီရင်ခံစာ၏ လေ့လာတွေ့ရှိချက်များ တွင် မြန်မာနိုင်ငံအနေဖြင့် သတင်းအချက်အလက် များအရ စီးပွားရေးလုပ်ငန်းများအတွက် ကောင်းမွန် သော စည်းမျဉ်းဥပဒေများပေါ်ပေါက်လာစေရန်၊ ပြုပြင်ပြောင်းလဲမှုများ ကျယ်ကျယ်ပြန့်ပြန့် ဆောင်ရွက်သွားရန်လိုအပ်ပြီး လက်ရှိအခြေ အနေတွင် ပြောင်းလဲမှုများဖြစ်ပေါ်လာစေရန် ကြိုးပမ်းဆောင်ရွက်နေသော လမ်းကြောင်းပေါ် တွင် ရောက်ရှိနေကြောင်း ၄င်းကပြောသည်။

''စီးပွားရေးလုပ်ငန်းတွေစတင်ဖို့နဲ့ ချဲ့ထွင် နိုင်ဖို့ အခက်အခဲဖြစ်နေရတဲ့ စည်းမျဉ်းဥပဒေတွေ ကိုဖယ်ရှားပေးခြင်းက အစိုးရအနေနဲ့ စီးပွားရေး လုပ်ငန်းတွေ အောင်မြင်စွာဆောင်ရွက်ဖို့လွယ်ကူ အဆင်ပြေတဲ့ အခြေအနေမျိုးပေါ်ပေါက်လာဖို့ အားပေးဆောင်ရွက်နေတယ်လို့ ဆိုနိုင်ပါတယ်။ ဒီလိုဆောင်ရွက်မှုမျိုးကို ဒေသတွင်းမှာရှိတဲ့ အခြားအစိုးရတွေ ဆောင်ရွက်ခဲ့ကြပါတယ်''ဟု ၄င်းကပြောသည်။

မြန်မာနိုင်ငံအနေဖြင့်စီးပွားရေးလုပ်ငန်းများ ကောင်းမွန်စွာဆောင်ရွက်နိုင်ရေးအတွက် လိုအပ် သောစည်းမျဉ်းဥပဒေများ၊ အညွှန်းကိန်းများကို ပထမဆုံးအကြိမ်အဖြစ် လေ့လာနိုင်ခြင်းသည် မြန်မာ့စီးပွားရေးကဏ္ဍအတွက် ကြီးမားသော ခြေလှမ်းတစ်ရပ်ဟုခေါ်ဆိုနိုင်ပြီး Doing Business အစီရင်ခံစာတွင် စတင်ပါဝင်လာခြင်းသည် မြန်မာနိုင်ငံ၏ ပြုပြင်ပြောင်းလဲရေးလုပ်ငန်းစဉ် များ၏အကျိုးရလဒ်များကို တိုင်းတာအကဲခတ် နိုင်မည်ဖြစ်ကြောင်း အပြည်ပြည်ဆိုင်ရာဘဏ္ဍာ ရေးကော်ပိုရေးရှင်း၏ မြန်မာနိုင်ငံဆိုင်ရာ ဌာနေ ကိုယ်စားလှယ် မစ္စတာချားလ်ရှနိုက်ဒါက ပြော သည်။

''စီးပွားရေးလုပ်ငန်းတွေဆောင်ရွက်ဖို့ ပိုမိုကောင်းမွန်တဲ့ အခြေအနေတွေကိုဖန်တီး ပေးခြင်းအားဖြင့် အလုပ်အကိုင်အခွင့်အလမ်း တွေဖန်တီးပေးမယ့် စီးပွားရေးလုပ်ငန်းတွေကို စီးပွားရေးလုပ်ငန်းရှင်တွေ၊ ရင်းနှီးမြှုပ်နှံသူတွေ ကအကောင်အထည်ဖော်ဆောင်ရွက်နိုင်မှာဖြစ် တယ်'' ဟု ၄င်းကထည့်သွင်းပြောသည်။

Doing Business အစီရင်ခံစာသည် အသေးစားနှင့် အလတ်စားစီးပွားရေးလုပ်ငန်းများ အတွက် စည်းမျဉ်းဥပဒေများကို သိရှိနားလည် ခြင်းဟုအမည်ပေးထားပြီး အစီရင်ခံစာကိုအရှေ့ အာရှနှင့် ပစိဖိတ်ဒေသရှိ နိုင်ငံ ၂၃ နိုင်ငံ အနက် ၂၂ နိုင်ငံတွင် ၂ဝဝ၅ ခုနှစ်မှစတင် ကာ လေ့လာဆန်းစစ်ခဲ့ခြင်းဖြစ်ပြီး နိုင်ငံများ၏ စည်းမျဉ်းဥပဒေများကို စီးပွားရေးလုပ်ငန်းများ ကောင်းမွန်စွာဆောင်ရွက်နိုင်သည့် အခြေအနေ များဖြစ်ပေါ်လာစေရန် ပြုပြင်ပြောင်းလဲမှုများ ပြုလုပ်ခဲ့ကြောင်းသိရသည်။

ထိုဒေသခံ စီးပွားရေးလုပ်ငန်းများအတွက် စည်းမျဉ်းဥပဒေများ ကောင်းမွန်အောင်ဆောင် ရွက်သည့်ကာလအတွင်း တရုတ်နိုင်ငံသည် ထိပ်ဆုံးမှရပ်တည်နေပြီး ယခင်နှစ် ကမ္ဘာ့နိုင်ငံ အသီးသီး၏ စီးပွားရေးလုပ်ငန်းများတွင် စည်း မျဉ်းဥပဒေများကို ကောင်းမွန်အောင်ဆောင်ရွက် ရာတွင် တိုးတက်မှုအရှိဆုံး ထိပ်တန်းနိုင်ငံများ တွင် ဖိလစ်ပိုင်နိုင်ငံသည်လည်း ပါဝင်ကာယခု နှစ်တွင် အရှေ့တောင်အာရှနိုင်ငံများထဲမှ စင်ကာပူ နှင့် မလေးရှားနိုင်ငံများသည် ကမ္ဘာ့အကောင်းဆုံး စီးပွားရေးစည်းမျဉ်းဥပဒေများရှိသည့် ထိပ်တန်း၁ဝ နိုင်ငံတွင်ပါဝင်သည်။

Union Daily