အစိုးရအဖွဲ့ ရုံးစိုက်ရာ နေပြည်တော် ပျဉ်းမနားမြို့တွင် လွှတ်တော်အစည်းအဝေးများကို တက်ရောက် သတင်းရယူနေသူ The Voice သတင်းစာနှင့် အပတ်စဉ်ထုတ် စာစောင်၏ သတင်းထောက် ဦးအောင် ထက်ကို အမျိုးသားနှစ်ဦးက အောက်တိုဘာလ ၂၈ ရက်နေ့ ည ၁၀ နာရီခွဲခန့်တွင် ထိုးကြိတ် ရိုက်နှက်ခဲ့ ကြောင်း ကာယကံရှင်က ပြောကြားသည်။
crime_nptpmn-voiceဦးအောင်ထက်သည် အဆိုပါမြို့နယ် မင်္ဂလာရပ်ကွက် အမှတ်(၂) သံလမ်းဂိတ်အနီး ထမင်းဆိုင်တွင် ထမင်းစားပြီးနောက် The Voice ရုံးခန်းသို့ ဆိုင်ကယ်ဖြင့် ပြန်လာစဉ် မြို့ဦးရပ်ကွက် ဗိုလ်တောက်ထိန်လမ်းထောင့် အောင်ချမ်းသာဘုရား အနီးတွင် ၄င်းရှေ့၌ စက်ဘီးတစ်စီး ယိုင်နဲ့ကာ စီးနင်းလာသောကြောင့် ၄င်းက ဆိုင်ကယ်အရှိန်လျှော့၍ ရှောင်ကွင်းကာ မောင်းနှင်ခဲ့ကြောင်း၊ ယင်းနောက် စက်ဘီးမှာ လမ်းမလယ်သို့ ရောက်နေသဖြင့် ဆိုင်ကယ်ကို လမ်းဘေးချကာ မြေသားလမ်းတွင် မောင်းနှင် လာစဉ် စက်ဘီးသည် ဆိုင်ကယ်ဘက်သို့ လဲကျခဲ့သောကြောင့် ဆိုင်ကယ် မောင်းနှင်သူ ၄င်းက သွားရောက်တောင်းပန်စဉ် စက်ဘီးစီးလာသူ နှစ်ဦးက ထိုးကြိတ်ခဲ့ကြောင်း ၄င်းက ရှင်းပြသည်။
အဆိုပါ ဆိုင်ကယ်နှင့် စက်ဘီးချိတ်မိရာတွင် သတင်းထောက် စီးနင်းလာသော ဆိုင်ကယ်တွင် တပ်ဆင် ထားသော နောက်ကြည့်မှန်ကို ထိခိုက်ခဲ့ပြီး စက်ဘီးစီးနင်းလာသူ နှစ်ဦးကို ထိခိုက်ဒဏ်ရာ မရရှိခဲ့ကြောင်း ၄င်းက ရှင်းပြသည်။
“သူတို့က ဘယ်အလုပ်လုပ်လဲ မေးလို့ Voice က သတင်းထောက်ပါလို့ ဖြေတာကို ဒီရဲတွေကို မင်းဘယ် လောက် ပိုင်လဲလို့ မေးပြီး ငါကစစ်သားကွ၊ ဒီကရဲတွေ အကုန်ပိုင်တယ် ဆိုပြီး သူတို့ထဲက တစ်ယောက်က ဝင်ထိုးတယ်။ ရဲတွေကို ဆဲပြီး ကျွန်တော့်ကိုလည်း ထမရအောင် ဝိုင်းထိုးကြတာ။ ထပြေးဖို့ အချိန်တောင်မ ရဘူး” ဟု ၄င်းကဆိုသည်။
သတင်းထောက် ဦးအောင်ထက်ကို ကန်ကျောက် ထိုးကြိတ်ပြီးနောက် အဆိုပါလူနှစ်ဦးက ၄င်းတို့ စီးနင်းလာသော မိန်းမစီး စက်ဘီးကို ကိုယ်တိုင် ဖျက်ဆီးခဲ့ကြောင်း၊ အသက် ၂၀ ကျော်အရွယ် အခြား အမျိုးသား တစ်ဦးက လျော်ကြေးတစ်သိန်းခန့် ပေးရန် ဝင်ပြောသဖြင့် ၄င်းက ပိုက်ဆံ ပါမလာသဖြင့် ရုံးသို့ လိုက်ယူရန် ပြောကြားခဲ့ရာ ထပ်မံ ကန်ကျောက်ခဲ့ပြီး ဆိုင်ကယ်ပေါ်တင်ကာ လမ်းကြားတစ်ခုထဲသို့ မောင်းနှင်ရာ ဦးအောင်ထက်က မလိုက်ရဲကြောင်း ပြောဆို၍ ဆိုင်ကယ်ပေါ်မှ ခုန်ချစဉ် ထပ်မံ ကန်ကျောက် ခဲ့ကြောင်း၊ စတင်ဖြစ်ပွားချိန်မှ စ၍ ၄၅ မိနစ်အကြာတွင် အရပ်ဝတ်ဖြင့် ယာဉ်ထိန်းတစ်ဦး ရောက်လာချိန်မှ သက်သာရာရခဲ့ပြီး ထိုးကြိတ်သူ များက ထွက်ပြေးခဲ့ကြောင်း ၄င်းက ထပ်မံရှင်းပြသည်။
“တစ်သိန်း၊ တစ်သိန်းခွဲဆိုပြီး တောင်းတယ်။ ပေးမယ်လို့ ပြောတော့လည်း ထပ်ထိုးတယ်။ စစ်ထွက်တွေလို့ ပြောတယ်။ သူပုန်တွေတောင် သတ်လာတာ မင်းတို့လို ကောင်မျိုးကတော့ ဆိုပြီး ပြောဆိုပြီး ရိုက်နှက်ကြ တယ်” ဟု ဦးအောင်ထက်က ဆိုသည်။
အဆိုပါ ရိုက်နှက်သူကို ရဲတပ်ဖွဲ့၏ စုံစမ်းချက်အရ တရုတ်ကြီးသည် The Voice ရုံးခန်းဖွင့်လှစ်ရာ မြို့ဦးရပ် ကွက် တောင်သာအုပ်စု ပျဉ်းမနားမြို့နယ်တွင် နေထိုင်ပြီး ကျန်တစ်ဦးမှာ အမည်စုံစမ်းဆဲသာ ဖြစ်ပြီး အောင်ချမ်းသာရပ်ကွက် ကင်ပွန်းတန်း အုပ်စု ပျဉ်းမနားမြို့နယ်တွင် နေထိုင်ကြောင်း ပျဉ်းမနားမြို့နယ် မြို့မ ရဲစခန်းထံမှ စုံစမ်းသိရှိရသည်။
အဆိုပါ ထိုးကြိတ်ခံရမှုကို ( ပ ) ၆၄၉/၂၀၁၃၊ ပြစ်မှုပုဒ်မ – ၃၂၃၊ အများပြည်သူနှင့် သက်ဆိုင်သည့် နေရာတွင် ညစ်ညမ်းသော သီချင်း၊ ကဗျာ၊ သီဆိုခြင်း၊ စကားပြောဆိုခြင်း ပြစ်မှုပုဒ်မ – ၂၉၄ ဖြင့် အမှုဖွင့် အရေးယူထားပြီး ပြစ်မှုကျူးလွန်သူကို စုံစမ်း စစ်ဆေးဆဲ ဖြစ်ကြောင်း အဆိုပါ ရဲစခန်းထံမှ စုံစမ်းသိရှိရသည်။
အစိုးရအဖွဲ့ရုံးစိုက်ရာ နေပြည်တော်တွင် ယင်းကိစ္စ ဖြစ်ပွားမှုကို ရဲတပ်ဖွဲ့က ထိရောက်စွာ အရေးယူပေးရန် လိုအပ်ပြီး ယင်းကိစ္စသည် တရားဥပဒေ စိုးမိုးရေးကိစ္စ ဖြစ်သောကြောင့် အရေးယူပေးခြင်း မရှိပါက တရားရုံးသို့ ဦးတိုက်လျှောက်ထားနိုင်ကြောင်း ပြည်သူ့လွှတ်တော် တရားဥပဒေစိုးမိုးရေးနှင့် တည်ငြိမ်အေး ချမ်းရေး ကော်မတီဝင် အတွင်းရေးမှူး ဦးဝင်းမြင့်က ပြောကြားသည်။
အမျိုးသားလွှတ်တော် ကိုယ်စားလှယ်တစ်ဦး အနေနှင့် သတင်းထောက်တစ်ဦး ထိုးကြိတ်ခံရမှုကို ပျဉ်းမနား မြို့ရှိ ရဲဌာနထံ မေးမြန်းစုံစမ်းသွားမည် ဖြစ်ကြောင်း အမျိုးသားလွှတ်တော် ကိုယ်စားလှယ် ဦးဖုန်းမြင့်အောင် က ပြောကြားသည်။
The Voice
0 comments:
Post a Comment